التربح من العضوية هي المعضلة الأزلية وستكون الأبدية في مغارة علي بابا وال 400 ألف حرامي ومثلهم متاجرين ومزورين وبلشتيه .. وخلايا نائمة وخلايا امبحلقة واعية .. وعمالة هائمة بلا عمل سائبه .. تجوب شوارع منظمة وأخرى خربه .. أتى بهم من هو أوسع من الآفاق مذهبه ..!!
التربح أشكال وألوان وبكل مكان .. بعضوية الوزارة ولجان العيارة .. ومجلس الأمة والشركات والهيئات والجمعيات التعاونية إلخ إلخ إلخ ... والمثل القديم اللي انحفر بتفكير البعض الكثير من الناس وانتشر هو : (من صادها عشى عياله) .. ولايمكن أحد يحل محله لأنه العبقري المتفرد بمجاله !!
ولكن المقولة الحالية المتناسبة مع ارتفاع الميزانية هي
( من صادها عشى عيال الكرة الأرضية ) !!
فعيب تبوق ألحين مليون أو أثنين .. يحتقرونك !! علشان يحترمونك لازم ولابد وأن تسرق مبالغ خيالية .. لاداعي للتآمرولا للتخابر .. لاتعمل بكد ولا اتقلد بأحد..ولا اتزهب للسؤال رد .. أصلا محد بيسإلك.. فالمجال مفتوح لك .. والنهب بدونك وبك.. فشلك بالتردد ؟.. توكل على الشيطان !! لأن النظيف العفيف بها لزمان مودة قديمة بالنسبة لغالبية علية القوم وحتى متواضعيها..فهم يرونه مثل العملة الردية !!!
عشا لعيال مو جام وجبن وخبيزات .. ولا بيتزا وباستا .. أومعجنات وستيكات وللا سميجات .. أوسيزار سالاد بدون طماط وخيا ر.. أو حتى شاينيز على شموع .. وبصحينات بط وقلوب بين ضلوع .. أو سي فود محشي بمحار ولوبستر وكفيار..بقعدة فخمة وليمتها تسبب تخمة مابعدها جوع .. والحساب مقدما مدفوع !! لا لا لا !!
هذي العشيات العادية ..
عشا صيادنا الأخ اللي نصب الفخ .. ولخ المقسوم
ماينطبخ على ( جوله ) عادية ولا بأفران كهربائية .. أصلا ما يتقدم على طاولة ولاينحط على سماط !! بعضه ينزرط زراط .. وبعضه مطاط .. مايربط برباط مثل الأنواط ..!! ينفل وينقل .. يطير على بساط الريح ( تيك أوي) .. أوووي وييين ؟؟ مايندرا .. بس من بعيد ينسمع صوت بالإذن يرن .. كأنه ( تعفيط مع التشفيط ) !!
من عليه ؟ الله أعلم .. يمكن على المواطنين .. بس الواحد حرام يظن !!
المهم .. يقال إن وقود بعض الطبخ لأنه (عرد) غاز مو امعبأ بأنابيب .. ولاتانكي أو بيب .. ونفط ثقيل .. عبر أنبوب طويل .. وحصم كسارات .. وفحم مكلسن وجدور فولاذية لزوم الحرارة النووية !! ما تشب شعلتها غير سندات مركزية !! واستثمارات تستوي على بخار مساسر العلاقات الثنائية .. ابحدا الدول اللاتينية والأوربية والجزر البحرية .. واكزوزات طيارات حربية تشبه رافال .. وياااماال أوو يااامال .. مايشبعون هالعيال !! كل ماانقال
( أهب يا هالصيدة ) !!
صاحوا يواعااا .. نبي بعد مثل عشا إعيال ذاك الريال ..!!!!
